ਸ਼੍ਰੋਮਣੀ ਅਕਾਲੀ ਦਲ (ਯੂ. ਕੇ.) ਵਲੋਂ ਟਰਾਂਟੋ ਵਿੱਚ ਅਸਲੀ ‘ਨਾਨਕਸ਼ਾਹੀ ਕੈਲੰਡਰ’ ਜਾਰੀ ਕੀਤਾ 

ਟਰਾਂਟੋ ਵਿਚਲੇ ਤੱਤ ਗੁਰਮਤਿ ਪ੍ਰਚਾਰ ਦੇ ਕੇਂਦਰ ਗੁਰਦਆਰਾ ਸਿੱਖ ਲਹਿਰ (ਬਰੈਂਮਟਨ) ਵਿਖੇ ਸਿੱਖ ਕੌਮ ਦੇ ਮਹਾਨ ਜਰਨੈਲ ਬਾਬਾ ਬੰਦਾ ਸਿੰਘ ਬਹਾਦਰ ਵਲੋਂ ਸਥਾਪਤ ਖ਼ਾਲਸਾ ਰਾਜ ਦੀ ਤੀਜੀ ਸ਼ਤਾਬਦੀ ਨੂੰ ਸਮਰਪਤ 16 ਮਈ ਐਤਵਾਰ ਨੂੰ ਇੱਕ ਵਿਸ਼ੇਸ਼ ਸੈਮੀਨਾਰ ਕਰਵਾਇਆ ਗਿਆ। ਜਿਸ ਵਿੱਚ ਭਾਗ ਲੈਣ ਵਾਸਤੇ ਦੇਸ਼ ਵਿਦੇਸ਼ ਦੀਆਂ ਸਮੂਹ ਜਾਗਰੂਕ ਸਿੱਖ ਜਥੇਬੰਦੀਆਂ ਤੇ ਸਿੱਖ ਸੰਗਤਾਂ ਦੇ ਸਹਿਯੋਗ ਨਾਲ ਪੰਥ ਤੇ ਪੰਜਾਬ ਦੀ ਤਕਦੀਰ ਬਦਲਣ ਲਈ ਯਤਨਸ਼ੀਲ ਸ਼੍ਰੋਮਣੀ ਅਕਾਲੀ ਦਲ (ਯੂ. ਕੇ.) ਦੇ ਧਰਮ ਪ੍ਰਚਾਰ ਵਿੰਗ ਦੇ ਚੇਅਰਮੈਨ ਗਿਆਨੀ ਜਗਤਾਰ ਸਿੰਘ ਜਾਚਕ ਇੰਡੀਆ ਤੋਂ ਵਿਸ਼ੇਸ਼ ਤੌਰ ਤੇ ਪਹੁੰਚੇ। ਉਨ੍ਹਾਂ ਦਾ ਵਿਸ਼ਾ ਸੀ ‘ਪਹਿਲਾ ਸਿੱਖ ਰਾਜ ਕਿਵੇਂ ਸਥਾਪਤ ਹੋਇਆ’। ਉਨ੍ਹਾਂ ਕਹਿਆ ਕਿ ਰਿਣੀ ਹੋਣਾ ਚਾਹੀਦਾ ਸੀ ਸਮੁੱਚੇ ਭਾਰਤ ਵਾਸੀਆਂ ਨੂੰ ਖ਼ਾਲਸਾ ਪੰਥ ਦੇ, ਜਿਨ੍ਹਾਂ ਨੇ ਬਾਬਾ ਬੰਦਾ ਸਿੰਘ ਦੀ ਅਗਵਾਈ ਵਿੱਚ ਦੱਖਣ-ਏਸ਼ਆਈ ਜਜ਼ੀਰੇ ਦੀ 1000 ਸਾਲ ਦੀ ਅਤੇ ਪੰਜਾਬ ਦੀ 700 ਸਾਲ ਦੀ ਗਲਾਮੀ ਕੱਟ ਕੇ ਖ਼ਾਲਸਾ ਰਾਜ ਦੀ ਸਥਾਪਨਾ ਕਰਦਿਆਂ ਦੁਨੀਆ ਦੇ ਇਤਿਹਾਸ ਵਿੱਚ ਲੋਕ ਰਾਜ ਸਥਾਪਤ ਕੀਤਾ। ਪਰ, ਦੁੱਖ ਦੀ ਗੱਲ ਹੈ ਉਥੋਂ ਦੇ ਸੱਤਾਧਾਰੀ ਲੋਕ ਖ਼ਾਲਸੇ ਦੇ ਧੰਨਾਵਾਦੀ ਹੋਣ ਦੀ ਥਾਂ, ਦਿਨ ਰਾਤ ਉਹਦੀ ਅਜ਼ਾਦ ਤੇ ਨਿਆਰੀ ਹੋਂਦ ਨੂੰ ਮਿਟੌਣ ਦੇ ਮਨਸੂਬੇ ਘੜਦੇ ਰਹਿੰਦੇ ਹਨ। ਜਾਚਕ ਜੀ ਸਿੱਖ ਸੰਗਤਾਂ ਨੂੰ ਸੁਚੇਤ ਕੀਤਾ ਕਿ 14 ਮਈ ਸੰਨ 1710 ਵਿੱਚ ਸਰਹਿੰਦ ਫਤਹਿ ਕਰਕੇ ਖ਼ਾਲਸਾ ਰਾਜ ਦੇ ਝੂਲਾਏ ‘ਨੀਲੇ ਨਿਸ਼ਾਨ ਸਾਹਿਬ’ ਦਾ ਵੀ ਭਗਵਾਂਕਰਨ ਹੋ ਚੁੱਕਾ ਹੈ, ਜਿਸ ਪ੍ਰਤੀ ਪ੍ਰਤੀ ਪੰਥ ਨੂੰ ਗੰਭੀਰਤਾ ਨਾਲ ਵਿਚਾਰਨ ਦੀ ਲੋੜ ਹੈ। ਕਨੇਡਾ ਨਿਵਾਸੀ ਪ੍ਰਸਿੱਧ ਵਿਦਵਾਨ ਡਾ: ਗੁਰਦੇਵ ਸਿੰਘ ਸੰਘਾ ਦਾ ਪੇਪਰ ਸੀ ‘ਸਿੱਖ ਰਾਜ ਕਿਵੇਂ ਗਿਆ’। ਉਨ੍ਹਾਂ ਕਿਹਾ ਕਿ ਸਿੱਖ ਸ਼ਕਤੀ ਦਾ ਸੋਮਾ ਸੀ ਗੁਰਦੁਆਰਾ, ਪਰ ਦੁੱਖ ਨਾਲ ਕਹਿਣਾ ਪੈ ਰਿਹਾ ਕਿ ਦੁਨੀਆ ਵਿੱਚ ਅੱਜ ਕੋਈ ਵੀ ਅਜਿਹਾ ਗੁਰਅਸਥਾਨ ਨਹੀ, ਜਿਸ ਦੇ ਵਰਤਾਰੇ ਨੂੰ ਗੁਰਦੁਆਰੇ ਦੇ ਮਾਡਲ ਵਜੋਂ ਦੇਖਿਆ ਜਾ ਸਕੇ।

ਅਸਟ੍ਰੇਲੀਆ ਤੋਂ ਖਾੜਕੂ ਨੌਜਵਾਨਾਂ ਦੇ ਦਿਲਾਂ ਦੀ ਧੜਕਣ ਭਾਈ ਵਿਜੈਪਾਲ ਸਿੰਘ ਆਏ, ਜਿਨ੍ਹਾਂ ਨੇ ਬਾਬਾ ਬੰਦਾ ਸਿੰਘ ਜੀ ਦੀ ਅਦੁੱਤੀ ਸ਼ਹਾਦਤ ਨੂੰ ਬਿਆਨਦਿਆਂ ਉਸ ਪਿਛੋਕੜ ਤੇ ਪ੍ਰਭਾਵਾਂ ਦਾ ਵਰਨਣ ਕੀਤਾ। ‘ਪੰਜਾਬੀ ਡੇਲੀ (ਟਰਾਂਟੋ) ‘ਦੇ ਐਡੀਟਰ ਅਤੇ ਬੇਬਾਕ ਖ਼ਾਲਸਈ ਬੁਲਾਰੇ ਭਾਈ ਸੁਖਵਿੰਦਰ ਸਿੰਘ ਹੰਸਰਾ ਨੇ ਬਾਬਾ ਬੰਦਾ ਸਿੰਘ ਬਹਾਦਰ ਦੇ ਸਮੇਂ ਦੀ ਚੜ੍ਹਦੀ ਕਲਾ ਵਾਲੀ ਪੰਥਕ ਸਥਿਤੀ ਦਾ ਵਰਨਣ ਕਰਦਿਆਂ ਬਾਦਲ ਦੀ ਅਗਵਾਈ ਵਿੱਚ ਆਏ ਪੰਥਕ ਨਿਘਾਰ ਨੂੰ ਵੀ ਬੇਬਾਕੀ ਨਾਲ ਪ੍ਰਗਟ ਕੀਤਾ। ਉਨ੍ਹਾਂ ਕਿਹਾ ਕਿ ਜੇ ਬਾਬਾ ਬੰਦਾ ਸਿੰਘ ਦਾ ਸਥਾਪਤ ‘ਖ਼ਾਲਸਾ ਰਾਜ’ ਵਧੀਆ ਸੀ ਤਾਂ ਫਿਰ ਹੁਣ ਅਜ਼ਾਦ ਖ਼ਾਲਸਾ ਰਾਜ ਤੋਂ ਡਰ ਕਿਉਂ ਲਗ ਰਿਹਾ ਹੈ?

ਸਿੱਖ ਲਹਿਰ ਦੇ ਵਿਦਾਵਨ ਜਨਰਲ ਸਕਤਰ ਭਾਈ ਗੁਰਦੇਵ ਸਿੰਘ ਸੰਧਾਵਾਲੀਆ ਦੀ ਸਿਹਤ ਠੀਕ ਨਾ ਹੋਣ ਕਰਕੇ ਸਟੇਜ ਨੂੰ ਭਾਈ ਜਗਦੀਸ਼ ਸਿੰਘ ਮਾਂਗਟ ਨੇ ਬਾਖ਼ੂਬੀ ਸੰਭਾਲਿਆ। ਬਜ਼ੁਰਗ ਸਤਿਸੰਗੀ ਕਹਿ ਰਹੇ ਸਨ ਕਿ ਅਸੀਂ ਪਿਛਲੇ 38 ਸਾਲ ਵਿੱਚ ਟਰਾਂਟੋ ਵਿੱਚ ਅੱਜ ਵਰਗਾ ਜਾਣਕਾਰੀ ਭਰਪੂਰ ਸ਼ਾਨਦਾਰ ਸਮਾਗਮ ਨਹੀ ਸੁਣਿਆ ਅਤੇ ਨਾ ਹੀ ਦੇਖਿਆ ਹੈ। ਅਖ਼ੀਰ ਵਿੱਚ ਟਰਾਂਟੋ ਦੇ ਸਾਬਕਾ ਜੱਜ ਅਤੇ ਸਭਾ ਦੇ ਪ੍ਰਧਾਨ ਭਾਈ ਮਨਜੀਤ ਮਾਂਗਟ ਨੇ ਆਪਣੇ ਸਾਥੀਆਂ ਤੇ ਆਏ ਵਿਦਵਾਨਾਂ ਨੂੰ ਨਾਲ ਲੈ ਕੇ ਸ਼੍ਰੋਮਣੀ ਅਕਾਲੀ ਦਲ (ਯੂ. ਕੇ.) ਵਲੋਂ ਪੰਜਾਬ ਵਿੱਚ ਚਲਾਈ ਜਾ ਰਹੀ ਸਿੱਖ ਜਾਗ੍ਰਤੀ ਲਹਿਰ ਦੀ ਸ਼ਲਾਘਾ ਕੀਤੀ ਅਤੇ ਦਲ ਵਲੋਂ ਖ਼ਾਲਸਾ ਰਾਜ ਦੀ ਤੀਜੀ ਸ਼ਤਾਬਦੀ ਨੂੰ ਸਮਰਪਤ ਪ੍ਰਕਾਸ਼ਿਤ ਕੀਤਾ ਮੂਲਿਕ ਨਾਨਕਸ਼ਾਹੀ ਕੈਲੰਡਰ ਜਾਰੀ ਕੀਤਾ।

ਉਨ੍ਹਾਂ ਨੇ ਆਏ ਵਿਦਵਾਨਾਂ, ਸਿੱਖ ਸੰਗਤਾਂ ਤੇ ਸਹਿਯੋਗੀਆਂ ਦਾ ਧੰਨਵਾਦ ਕਰਦਿਆਂ ਚਿੰਤਾ ਪ੍ਰਗਟ ਕੀਤੀ ਕਿ ਜੇ ਕਰ ਵਿਦੇਸ਼ੀਂ ਵਸਦੇ ਸਿੱਖ ਭਾਈਚਾਰੇ ਨੇ ਕ੍ਰਿਪਾਨ ਦੀ ਦੁਰਵਰਤੋਂ ਨਾ ਰੋਕੀ ਤਾਂ ਇਸ ਤੇ ਪਾਬੰਦੀ ਵੀ ਲਗ ਸਕਦੀ ਹੈ। ਕਿਉਂਕਿ, ਹਕੂਮਤਾਂ ਤਾਂ ਬਹਾਨਾ ਹੀ ਭਾਲਦੀਆਂ ਹਨ।

ਜਾਰੀ ਕਰਤਾ: ਨਰਿੰਦਰ ਸਿੰਘ ਮੱਟੂ ਮੈਬਰ ਸਿੱਖ ਲਹਿਰ ਟਰਾਂਟੋ

  ਫਰੀਦਾਬਾਦ ਦੀ ਸੰਗਤਾਂ ਵੱਲੋਂ ਵਿਸਮਾਦ ਬੈਨਰ ਹੇਠ ਬਣੀ ਫਿਲਮ ਭਾਈ ਤਾਰੂ ਸਿੰਘ ਜੀ ਨੂੰ ਭਰਵਾਂ ਹੁੰਗਾਰਾ ਮਿਲਿਆ

ਗੁਰਬਾਣੀ ਅਤੇ ਸਿੱਖ ਇਤਿਹਾਸ ਤੋਂ ਟੁੱਟੇ ਹੋਣ ਕਾਰਣ ਗੁਰਸਿੱਖਾਂ ਦਾ ਆਪਸੀ ਪਿਆਰ ਖਤਮ ਹੋ ਚੁੱਕਿਆ ਹੈ ਜਿਸ ਨੂੰ ਮੁੜ ਪੈਦਾ ਕਰਨ ਦੀ ਲੋੜ: ਸ. ਸੁਖਵਿੰਦਰ ਸਿੰਘ, ਡਾਇਰੈਕਟਰ

(26 ਅਪ੍ਰੈਲ 2010 , ਸਤਨਾਮ ਕੌਰ, ਫਰੀਦਾਬਾਦ)

ਦੋ ਰੋਜ਼ਾ ਐਨੀਮੇਸ਼ਨ ਮੂਵੀ ਭਾਈ ਤਾਰੂ ਸਿੰਘ ਜੀ ਦਾ ਸਫਲ ਮੰਚਨ ਫਰੀਦਾਬਾਦ ਦੇ ਮਿਯੂਨਿਸਪਲ ਆਡੀਟੋਰੀਅਮ ਵਿਖੇ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਨੰ. 1 ਦੀ ਅਗਵਾਈ ਅਤੇ ਫਰੀਦਾਬਾਦ ਦੇ ਸਮੁਹ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਦੇ ਸਹਿਯੋਗ ਨਾਲ ਸਿਰੇ ਚੜਿਆ। ਐਨੀਮੇਸ਼ਨ ਫਿਲਮ ਭਾਈ ਤਾਰੂ ਸਿੰਘ ਜੀ ਵਿਚ ਭਾਈ ਤਾਰੂ ਸਿੰਘ ਜੀ ਦੀ ਮਹਾਨ ਸਖਸੀਅਤ ਨੂੰ ਸਿੱਖੀ ਸਿਦਕ, ਭਰੋਸਾ, ਪਿਆਰ, ਨਿਮਰਤਾ, ਉਦਮ, ਸੇਵਾ, ਸੰਤੋਖ, ਨਿਡਰਤਾ, ਹੁਕਮ ਮੰਨਣਾ ਅਤੇ ਭਾਈ ਤਾਰੂ ਸਿੰਘ ਜੀ ਦਾ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਸਿੱਖਿਆਵਾਂ ਉਤੇ ਅਟਲ ਭਰੋਸਾ ਕਰਦੇ ਹੋਏ ਸਿੱਖੀ ਸਰੂਪ ਕੇਸਾਂ ਨੂੰ ਅਪਣੀ ਜਾਨ ਤੋਂ ਵੀ ਵੱਧ ਪਿਆਰ ਕਰਣਾ ਆਦਿਕ ਗੁਣਾਂ ਨੂੰ ਬੜੀ ਖੂਬਸੁਰਤੀ ਨਾਲ ਪਿਰੋਇਆ ਗਿਆ।  ਇਸ ਫਿਲਮ ਨੂੰ ਦਰਸ਼ਕਾਂ ਅਤੇ ਨੌਜਵਾਨ ਪੀੜ੍ਹੀ ਵੱਲੋਂ ਖੂਬ ਸਲਾਹਿਆ ਗਿਆ। ਇਕ ਖਾਸ ਗੱਲ ਜੋ ਧਿਆਨ ਦੇਣ ਯੋਗ ਸੀ ਉਹ ਕਿ ਜਿਥੇ ਇਸ ਫਿਲਮ ਨੂੰ ਵੇਖਣ ਵਿਚ ਬਜ਼ੂਰਗਾਂ ਨੇ ਉਤਸਾਹ ਵਿਖਾਇਆ ਉਥੇ ਸਿੱਖ ਕੌਮ ਦੀ ਨੌਜਵਾਨ ਪੀੜ੍ਹੀ ਜੋ ਅੱਜ ਸਾਡੇ ਗੁਰਦੁਆਰਿਆਂ ਵਿਚ ਜਾਣ ਤੋਂ ਵੀ ਝਿਜਕ ਮਹਿਸੂਸ ਕਰ ਰਹੀ ਹੈ ਉਨ੍ਹਾਂ ਨੇ ਇਸ ਫਿਲਮ ਨੂੰ ਵੇਖਣ ਵਿਚ ਵੱਧ ਚੜ੍ਹ ਕੇ ਹਿੱਸਾ ਪਾਇਆ। ਦੋ ਦਿਨਾਂ ਤੋਂ ਲਗਾਤਾਰ ਚਲ ਰਹੇ ਸ਼ੋ ਵਿਚ ਆਡੀਟੋਰੀਆਮ ਦਾ ਹਾਲ ਖਚਾਖਚ ਭਰਿਆ ਰਿਹਾ। ਜ਼ਿਕਰਯੋਗ ਹੈ ਕਿ ਭਾਈ ਤਾਰੂ ਸਿੰਘ ਜੀ ਵਿਸਮਾਦ ਬੈਨਰ ਹੇਠ ਬਣੀ  ਇਹ ਚੌਥੀ ਐਨੀਮੇਸ਼ਨ ਫਿਲਮ ਹੈ ਇਸ ਤੋਂ ਪਹਿਲਾਂ ਵੀ ਵਿਸਮਾਦ ਨੇ ਐਨੀਮੇਸ਼ਨ ਦੇ ਰੂਪ ਵਿਚ ਸਾਹਿਬਜ਼ਾਦੇ, ਦਾ ਰਾਇਸ ਆਫ ਖਾਲਸਾ ਬਾਬਾ ਬੰਦਾ ਸਿੰਘ ਬਹਾਦਰ ਅਤੇ ਬਹਾਦਰ ਸਿੰਘਣੀ ਸੁੰਦਰੀ ਦੇ ਕਿਰਦਾਰ ਨੂੰ ਬਾਖੂਬੀ ਐਨੀਮੇਸ਼ਨ ਫਿਲਮ ਦਾ ਰੂਪ ਦੇ ਕੇ ਘਰ ਘਰ ਤਕ ਸਿੱਖ ਇਤਿਹਾਸ ਅਤੇ ਗੁਰਬਾਣੀ ਬਾਰੇ ਸਿੱਖ ਸੰਗਤਾਂ ਵਿਚ ਜਾਗ੍ਰਿਤੀ ਲਿਆਉਣ ਦਾ ਸ਼ਲਾਘਾਯੋਗ ਬੀੜਾ ਚੁੱਕਿਆ ਹੋਇਆ ਹੈ। ਇਸ ਮੌਕੇ ਸਪੋਕਸਮੈਨ ਨਾਲ ਗੱਲਬਾਤ ਕਰਦਿਆਂ ਫਿਲਮ ਦੇ ਡਾਇਰੈਕਟ ਸ. ਸੁਖਵਿੰਦਰ ਸਿੰਘ ਨੇ ਭਾਈ ਤਾਰੂ ਸਿੰਘ ਜੀ ਮੂਵੀ ਬਾਰੇ ਦਸਦਿਆਂ ਕਿਹਾ ਕਿ ਇਹ ਇਕ ਉਪਰਾਲਾ ਹੈ ਸਿੱਖ ਕੌਮ ਨੂੰ ਗੁਰਬਾਣੀ ਅਤੇ ਸਿੱਖ ਇਤਿਹਾਸ ਨਾਲ ਜੋੜਨ ਦਾ ਜਿਸ ਨਾਲ ਪਤਿਤਪੁਨੇ ਦੀ ਲਹਿਰ ਨੂੰ ਠੱਲ੍ਹ ਪਾਇਆ ਜਾ ਸਕੇ। ਉਨ੍ਹਾਂ ਆਉਣ ਵਾਲੇ ਨਵੇਂ ਐਨੀਮੇਸ਼ਨ ਪ੍ਰੋਜੈਕਟ ਵਿਚ ਸ਼ਹੀਦ ਭਾਈ ਸੁਬੇਗ ਸਿੰਘ ਸ਼ਾਹਬਾਜ ਸਿੰਘ ਦਾ ਵੀ ਜ਼ਿਕਰ ਕੀਤਾ । ਫਿਲਮ ਬਣਨ ਵਿਚ ਆਉਣ ਵਾਲੀ ਸਮੱਸਿਆਵਾਂ ਬਾਰੇ ਜਦ ਪੁਛਿਆ ਗਿਆ ਤਾਂ ਉਨ੍ਹਾਂ ਦਾ ਇਹੀ ਕਹਿਣਾ ਸੀ ਕਿ ਫਿਲਮ ਬਣਾਉਣ ਵਿਚ ਜਿੰਨੀ ਦਿਕੱਤਾਂ ਮਹਿਸੂਸ ਨਹੀਂ ਹੁੰਦੀਆਂ ਉਨ੍ਹੀ ਦਿੱਕਤ ਮਾਇਕ ਤੌਰ’ਤੇ ਆਉਂਦੀ ਹੈ ਕਿਉਂਕਿ ਅਜਿਹੇ ਕੰਮਾਂ ਨੂੰ ਸਲਾਹਿਆ ਤਾਂ ਬਹੁਤ ਜਾਂਦਾ ਹੈ ਪਰ ਕੋਈ ਸੰਸਥਾਵਾਂ ਮਜ਼ਬੂਤੀ ਨਾਲ ਬਾਹਾਂ ਫੜਨ ਨੂੰ ਤਿਆਰ ਨਹੀਂ ਰਹਿੰਦੀਆ । ਸ. ਸੁਖਵਿੰਦਰ ਸਿੰਘ ਨੇ ਕਿਹਾ ਕਿ ਦਰਸ਼ਕਾਂ ਨੂੰ ਪਾਈਰੇਟੀਡ ਤੋਂ ਬਚ ਕੇ ਸਿੱਧੇ ਤੌਰ’ਤੇ ਡੀ.ਵੀ.ਡੀ. ਖਰੀਦਣੀ ਚਾਹੀਦੀ ਹੈ ਤਾਂ ਜੁ ਸੰਗਤਾਂ ਵੱਲੋਂ ਪ੍ਰਾਪਤ ਇਸ ਮਾਇਕ ਸਹਿਯੋਗ ਨਾਲ ਅਗਾਂਹ ਬਣ ਰਹੇ ਨਵੇਂ ਪ੍ਰੋਜੈਕਟਾਂ ਵਿਚ ਕਿਸੇ ਕਿਸਮ ਦੀ ਦਿਕੱਤ ਨਾ ਮਹਿਸੂਸ ਹੋਵੇ। ਉਨ੍ਹਾਂ ਦਸਿਆ ਕਿ ਸਿੱਖ ਕੌਮ ਦੀ ਤ੍ਰਾਸਦੀ ਹੈ ਕਿ ਇਸ ਦੇ ਲਾਸਾਨੀ ਇਤਿਹਾਸ ਅਤੇ ਗੌਰਵ ਨੂੰ ਸਿੱਖ ਹੀ ਨਹੀਂ ਜਾਣਦੇ ਹਨ, ਜੇਕਰ ਕੋਈ ਸਿੱਖ ਇਤਿਹਾਸ ਨੂੰ ਸੁਣ ਲਵੇ ਤਾਂ ਉਸ ਦਾ ਜੀਵਨ ਹੀ ਬਦਲ ਜਾਵੇ। ਉਨ੍ਹਾਂ ਸਿੱਖ ਕੌਮ ਦੇ ਅਜੋਕੇ ਹਾਲਾਤਾਂ ਉਤੇ ਅਫਸੋਸ ਜਤਾਉਦਿਆਂ ਕਿਹਾ ਕਿ ਅੱਜ ਗੁਰਸਿੱਖ ਆਪਸ ਵਿਚ ਇਕ ਦੂਜੇ ਨੂੰ ਨੀਵਾਂ ਵਿਖਾ ਰਹੇ ਹਨ ਜਿਸ ਨਾਲ ਗੁਰਸਿੱਖਾਂ ਵਾਲਾ ਆਪਸੀ ਪਿਆਰ ਖਤਮ ਹੁੰਦਾ ਜਾ ਰਿਹਾ ਹੈ ਜਿਸ ਦਾ ਸਭ ਤੋਂ ਵੱਡਾ ਕਾਰਣ ਗੁਰਬਾਣੀ ਅਤੇ ਸਿੱਖ ਇਤਿਹਾਸ ਤੋਂ ਟੁੱਟੇ ਹੋਣਾ ਹੈ ਜਦ ਕਿ ਗੁਰਬਾਣੀ ਉਤੇ ਅਟਲ ਨਿਸ਼ਚਾ ਕਰਣ ਕਰ ਕੇ ਪੁਰਾਤਨ ਸਿੰਘਾਂ ਵਿਚ ਆਪਸੀ ਪਿਆਰ ਰੱਜ ਕੇ ਭਰਿਆ ਹੋਇਆ ਸੀ ਜਿਸ ਦਾ ਝਲਕਾਰਾ ਸਾਨੂੰ ਸਿੱਖ ਇਤਿਹਾਸ ਤੋਂ ਮਿਲਦਾ ਹੈ । ਉਨ੍ਹਾਂ ਕਿਹਾ ਕਿ ਐਨੀਮੇਸ਼ਨ ਫਿਲਮ ਭਾਈ ਤਾਰੂ ਸਿੰਘ ਜੀ ਰਾਹੀਂ ਗੁਰਸਿੱਖਾਂ ਵਾਲੇ ਆਪਸੀ ਪਿਆਰ ਨੂੰ ਵੀ ਉਭਾਰ ਕੇ ਪੇਸ਼ ਕੀਤਾ ਗਿਆ ਹੈ ਤਾਂ ਜੁ ਸਿੱਖਾਂ ਅੰਦਰ ਆਪਸੀ ਮਤਭੇਦ ਭੁਲਾ ਕੇ ਮੁੜ ਪਿਆਰ ਵਾਲੀ ਭਾਵਨਾ ਪੈਦਾ ਕੀਤੀ ਜਾ ਸਕੇ। ਫਿਲਮ ਦੇ ਅਖੀਰਲੇ ਸ਼ੋ ਵਿਚ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਨੰ. 1 ਦੇ ਮੀਤ  ਪ੍ਰਧਾਨ ਸ. ਸੁੰਦਰ ਸਿੰਘ ਨੇ ਸਟੇਜ ਤੋਂ ਜਿੱਥੇ ਸੰਗਤਾਂ ਵੱਲੋਂ ਮਿਲੇ ਭਰਵੇਂ ਹੁੰਗਾਰੇ ਲਈ ਧੰਨਵਾਦ ਕੀਤਾ ਗਿਆ ਉਥੇ ਫਿਲਮ ਦੇ ਡਾਇਰੈਕਟਰ ਸ. ਸੁਖਵਿੰਦਰ ਸਿੰਘ ਅਤੇ ਉਨ੍ਹਾਂ ਦੀ ਟੀਮ ਦਾ ਧੰਨਵਾਦ ਵੀ ਕੀਤਾ। ਯੰਗ ਸਿੱਖ ਐਸੋਸਿਏਸ਼ਨ ਦੇ ਨੌਜਵਾਨ ਆਗੂ ਸ. ਗੁਰਿੰਦਰ ਸਿੰਘ ਅਤੇ ਸ. ਹਰਦੀਪ ਸਿੰਘ ਨੇ ਫਿਲਮ ਦੇ ਸਫਲ ਮੰਚਨ ਲਈ ਡਾਇਰੈਕਟਰ ਸ. ਸੁਖਵਿੰਦਰ ਸਿੰਘ ਦੇ ਇਸ ਨਿਵਕਲੇ ਉਪਰਾਲੇ ਲਈ ਵਧਾਈ ਦਿੱਤੀ। ਸ. ਗੁਰਿੰਦਰ ਸਿੰਘ ਨੇ ਸਿੱਖ ਸੰਗਤਾਂ ਨੂੰ ਬੇਨਤੀ ਕੀਤੀ ਕਿ ਉਹ ਵੱਧ ਚੜ੍ਹ ਕੇ ਫਿਲਮ ਦੇ ਵੱਖ ਵੱਖ ਇਲਾਕਿਆਂ ਹੋਣ ਵਾਲੇ ਸ਼ੋ ਵਿਚ ਹਿੱਸਾ ਲੈ ਕੇ ਭਰਪੂਰ ਸਹਿਯੋਗ ਦੇਣ। ਉਨ੍ਹਾਂ ਕਿਹਾ ਕਿ ਅਜਿਹੇ ਪ੍ਰੋਜੈਕਟ ਜਿਸ ਵਿਚ ਵੱਧ ਮਾਇਕ ਸਹਾਇਤਾ ਦੀ ਲੋੜ ਹੁੰਦੀ ਹੈ ਉਥੇ ਕਰੋੜਾਂ ਰੁਪਏ ਦੇ ਬਜ਼ਟ ਵਾਲੀ ਕਮੇਟੀਆਂ ਨੂੰ ਵੀ ਅਪਣਾ ਫਰਜ਼ ਸਮਝਦੇ ਹੋਏ ਵੱਧ ਚੜ੍ਹ ਕੇ ਅਜਿਹੇ ਕਾਰਜਾਂ ਵਿਚ ਸਹਿਯੋਗ ਦੇਣਾ ਚਾਹੀਦਾ ਹੈ ।